Rakel spakel

Rakel er svo mikil dúlla....
Svansa, Halli og Rakel, litla þriggja ára krúttið þeirra voru að flytja til Danmerkur fyrir ca. mánuði síðan. Rakel hefur ekki verið neitt sérstaklega dugleg að læra dönskuna og finnst ekkert gaman að krakkarnir í kringum hana bulli bara við hana og segi aldrei neitt að viti. Hún hefur heldur ekki verið neitt voðalega sátt við leikskólann því krakkarnir og fóstrurnar þar bulla bara út í eitt og hún skilur ekki orð.
Reyndar hefur litlu stúlkunni farið smá fram og er hún búin að eignast danska vinkonu sem hún leikur stundum við uppi í herberginu sínu. Svansa hefur yndi af að fylgjast með samskiptarörðugleikunum á milli þeirra því Rakel skilur ekki orð af því sem vinkonan segir og öfugt. Rakel hefur ráðið bót úr máli og hefur ákveðið að gera líkt og vinkonan... Hún bullar bara..:"Tarúskí bala gúngí... Da sítí rúmpa? Galósíbó ramaga.." Svo inn á milli segir hún:"komm, komm!!". Þetta nýuppfundna tungumál hefur tekist svo vel við nýju vinkonuna að hún er byrjuð að tala við foreldra sína á þessu sama máli.... Þegar hún sér að þessar stóru skepnur standa á gati og skilja ekki hvað hún er að segja þá gerist hún þýðandi og þýðir yfir á íslensku það sem hún var að segja á bullískunni.

Ég hlakka svo til að sjá litla krúttið mitt og systir mína og manninn hennar um jólin.. Ég bara get ekki beðið!!!