Útvöxtur á enni til ama

Ég þrái að binda enda á þjáningar mínar. Óþægindin orsakast af ofvexti á ofan-og framan-verðri höfuðkúpu minni og ekki falla mér margir kostir í völ við að losna við þetta, heilkenni, eins og það er kallað. Já ég þjáist mjög og á hverjum degi. Þessi ofvöxtur veldur óbærilegri svitamyndun á enninu og stundum á ég erfitt með að sjá skýrt sökum tímabundinnar hálfblindu. Einnig veldur ofvöxturinn verkjum í hálsvöðvum sem leiðir út í axlir og stundum ofanvert bak. ég á mér einungis tveggja kosta völ, annan völ sem kostar fjárútlát og hinn sem mun aftra mér í smá tíma þar til heilkennið hefur vaxið út. Ég hef ákveðið að fyrri kosturinn henti mér betur og þarf ég að greiða úr þessu vandamáli sem fyrst, þar sem ég er á pantað flug til Lundúna næsta mánudag. Því þarf ég að hafa hraðan á og ákveða hvenær ég hef tíma til að fara í klippingu...